Reshjet e shiut me intensitet të lartë, që kanë filluar që prej orës 18:00 në qytetin e Elbasanit dhe në të shtatë bashkitë e këtij qarku, kanë shkaktuar probleme të mëdha në qarkullimin e këmbësorëve dhe automjeteve, veçanërisht në disa rrugë kryesore të zonave urbane, ku janë shkaktuar vërshime të mëdha uji.
Prurjet e ujit për shkak të reshjeve janë tepër të mëdha dhe kolektorët e kanalizimeve nuk mund të përballojnë sasitë e jashtëzakonshme të ujit. Si rezultat, disa segmente rrugore dhe garazhe janë përmbytur në pjesë të ndryshme të qytetit të Elbasanit.
Po ashtu, disa pjesë të rrugës kombëtare Elbasan-Librazhd-Prrenjas po hasin vështirësi serioze.
Në disa segmente ka ndodhur përmbytje, ndërsa në të tjera, si në Labinot Fushë, Kthesat e Murrashit, Pishkak dhe vende të tjera, ka pasur mbushje me inerte të sjella nga dalja nga shtrati i lumenjve malorë, si dhe rënie të gurëve dhe masivave të dherave nga lartësitë.
Shërbimet e policisë rrugore janë vendosur në të gjitha segmentet problematike dhe kërkohet që përdoruesit e rrugës Tiranë-Korçë të evitojnë qarkullimin gjatë natës së të premtes, pasi kushtet atmosferike paraqesin rrezik të madh për sigurinë.
