Reshjet e dendura të shiut kanë sjellë disa problematika në zona të ndryshme. Aksi rrugor Sarandë- Gjirokastër është bllokuar për shkak të motit të keq.
Për shkak të reshjeve të dendura, lumi Bistricë ka dalë nga shtrati duke shkaktuar vështirësi në lëvizjen e makinave në këtë aks si dhe ka shkaktuar probleme serioze tek fushat poshtë fshatit Metoq.
Rrëshqitja e dherave ka bllokuar aksin në afërsi të Bistricës, drejt Qafë Muzinës. Bllokimi i rrugës ka shkaktuar radhë kilometrike mjetesh nga të dyja anët dhe pritet ndërhyrja e mjeteve të rënda për hapjen e aksit.
Bashkia e Finiqit, ka bërë edhe një njoftim për mediat duke dhënë detaje lidhur me situatën.
Njoftimi i Bashkisë së Finiqit:
“Probleme nga moti i keq, me shira të rrëmbyer me përmbytje e madje edhe përmbytje të banesave pati sot në disa fshatra të bashkisë Finiq. Në fshatin Jermë pati rrëshqitje të rrugës. Tek ura e madhe në fshatin Caush dhe Krabe lumi i Bistricës doli nga shtrati, duke krijuar probleme për banorët dhe mjetet e kësaj zone. Fshatrat Finiq, Clirim, u përmbytën nga kanali KK3.Përmbytje ka edhe në zonën industriale në Vrion”, shkruhet në njoftimin e Bashkisë.
Kujtojmë se për shkak të reshjeve kanë dalur nga shtrati sot edhe lumi Ishëm dhe lumi i Vjosës. Ndërkohë meteorologët dhe IGJEUM ka parashikuar edhe përmbytje të mëdha në zonën e Shkodrës./Gazetareforma.com/
