Gjatë këtyre ditëve vendi ynë dhe Kosova janë përballur me reshje të dendura shiu dhe dëbore të cilat duket se kanë krijuar shumë probleme, në rrugë, banesa por edhe toka bujqësore. Mësohet se njësoj si në Shqipëri ku u tregua për rrugët e prishura e njêjta gjë ka ndodhur dhe në Kosovë. Komuna e Malishevës ka njoftuar se për shkak të reshjeve të shumta të shiut dhe vërshimeve, rruga që lidh fshatin Rud me fshatin Sferkë të Klinës, është dëmtuar rëndë dhe është tërësisht e pakalueshme. Nga pamjet shihet se si rruga është ndarë në dy pjesë dhe asfalti është dëmtuar shumë duke e bërë të pakalueshme këtë aks për mjetet e transportit, të cilat tani duhet të përdorin rrugë alternative për të lêvizur. Dëmtime të tilla të rrugëve nxjerrin në pah problemet e shumta dhe keqpërdorimet e fondeve për shtrimin e rrugëve.
Njoftimi i Komunës:
“Si pasojë e reshje të shumta dhe vërshimeve, rruga që lidhë fshatin Rud të Malishevës me fshatin Sferkë të Klinës, është dëmtuar rëndë dhe është tërësisht e pakalueshme, pasi rruga është këputur dhe asfalti është larguar në tërësi. Luten të gjithë ata që mendojnë të kalojnë nëpër atë rrugë, të mos udhëtojnë në atë pjesë, por të shfrytëzojnë rrugët tjera”
