Autoriteti Rrugor Shqiptar (ARRSH), ka njoftuar se pas reshjeve të dendura të shiut që shkaktuan rrëshqitje dherash në disa akse kryesore rrugore, instancat përkatëse kanë zbritur në terren për të bërë të mundur normalizimin e situatës.
IGJEUM prej disa ditësh ka paralajmëruar që për shkak të motit të keq, priten përmbytje në disa zona të vendit. Si pasojë e reshjeve të dendura, rrëshqitjes së dherave dhe daljes nga shtrati të disa lumenjve, shumë akse rrugore në vend janë bllokuar.
Në lidhje me situatën ka reaguar edhe Presidenti Meta, i cili i ka bërë apel qeverisë që të marrë masat sa më shpejt që të jetë e mundur.
Po ashtu edhe ministria e Bujqësisë, Milva Ekonomi, për shkak të situatës nga reshjet intensive, ka ftuar në takim drejtuesit e DRUK, që mbulojnë të gjithë infrastrukturën ujore në vend.
Në takim, Ekonomi ka bërë me dije se ka kërkuar prej tyre që të mos ndërpritet energjia elektrike, pasi në të kundërt do të kishte bllokim të ujit dhe rrjedhimisht edhe përmbytje.
Njoftimi i ARRSH-së:
Njoftim për gjendjen e akseve kombëtare
Si pasojë e shirave të dendura ka pasur rënie gurësh e materialesh në trup të rrugës, si në segmentin Ura e Kranesë-Syri i Kalter, ku u vazhdua puna me mjete e punëtorë dhe rruga tashmë është e hapur.
Në Elbasan-Qafë Thanë, Berat-Corovodë ka pasur rënie materialesh në trup të rrugës si pasojë e shiut. Është bërë pastrimi i plotë i rrugës dhe nuk ka probleme me qarkullimin.
Drejtuesit e mjeteve të tregohen të kujdesshëm për shkak të lagështisë në rrugë, të reduktojnë shpejtësinë dhe të respektojnë sinjalistikën./Gazetareforma.com/
