Shefja e Departamentit të Epidemiologjisë në ISHP, Silva Bino ka qenë e ftuar në emisionin “Log” në ABC News ku ka folur edhe në lidhje me masat kufizuese të pandemisë. Bino ka thënë se ajo do sugjeronte që maskat mbrojtëse të mos mbahen më në ambiente të hapura, por diçka e tillë nuk duhet të ndodhë në ambiente të mbyllura si markete apo qendra tregtare. Kjo pasi ka njerëz që nuk kanë krijuar imunitet pasi kanë kaluar dhe mund të infektohen sërish dhe gjithashtu mund të ketë mutacione të Covid në qarkullim. E pyetur në lidhje me organizimin e dasmave, Bino tha se mund të fillojnë që këtë verë, por me një numër të kufizuar personash, më pak se 100.
“Do sugjeroja, personalisht që mbajtja e maskave në publik të mos mbahet më. Por mbajtja e maskave në ambiente të mbyllura… duhet të mbajnë të gjithë maska. Në markete, në qendra tregtare. Në vende ku ka grumbullime njerëzish duhen mbajtur. Ka njerëz që edhe pse e kanë kaluar, nuk kanë krijuar imunitet dhe mund të riinfektohen. Mund të kemi mutantë. Përderisa e kemi mes nesh… Covidi është sëmundje e re, nuk mjafton një vit për ta njohur. Ne duhet të jemi sa më të kujdesshëm, kjo do të vlerësohet pastaj në bazë të studimeve, për të parë edhe impaktin e vaksinave”, tha Bino.
