Forcat RENEA kanë shtrirë aksionin e tyre në pesë qytete të vendit ditën e sotme. Vlora, Fieri, Lushnja, Durrësi dhe Elbasani kanë qenë në fokus të aksionit.
Në të pestë qytetet po zhvillohen kontrolle në lokale apo edhe në zona ku mendohet se mund të ketë të fshehur persona me rrezikshmëri të lartë. Bëhet me dije se deri tani kanë rënë në pranga të paktën 10 persona.
Në Vlorë u arrestua Edison Begaj. Ai i shpëtoi një atentati që iu bë në sy të fëmijëve në 29 maj, ndërsa sot ka rënë në prangat e policisë. Begaj u arrestua në kuadër të operacionit “blic” të RENEA-së në Vlorë.
Begaj është arrestuar pasi mësohet se është kapur në flagrancë më një armë zjarri.
Në mbrëmjen e 29 majit, Begaj ishte shënjestër e një atentati ndërsa po udhëtonte në makinë me fëmijët e tij. Një person me unifromë policie i zuri pritë, ndërsa sapo ai doli nga mjeti u përball me plumbat. Gjithçka ndodhi në praninë e fëmijëve të tij.
Ende nuk dihet asgjë për autorët e atentatit dhe policia ka gjetur deri tani vetëm një makinë të djegur. Arsyeja e ngjarjes mendohet se kanë qenë pazaret e drogës.
Edison Begaj ka qenë i dënuar me 7 vite e 6 muaj burg për drogë në shkurt të vitit 2008. Ai është bërë gjithashtu subjket i OFL-së në lidhje me pasurinë e tij.
