Vetëm pak orë pasi u inagurua, rruga e Arbrit është bllokuar duke shkaktuar kaos dhe pasiguri.
Ish-deputeti i PD-së Xhemal Gjunkshi ka publikuar pamjet e bllokimit të rrugës së Arbrit nga moti i keq që ka përfshirë vendin.
Mësohet se me qindra qytetarë janë bllokuar në aksin e sapo hapur, nga Tirana deri në Fshatin -Fshat (Klos).
Gazetari Enver Doçi raportoi për “BalkanWeb” se drejt Qafë-Murrizit ku ka ndodhur dhe bllokimi i qarkullimit janë nisur tre borëpastruese si dhe forcat e policisë së Burrelit.
Megjithatë është pothuajse e pamundur futja e borëpastrueseve për shkak se të dyja krahët e rrugës janë të bllokuara nga makinat që lëvizin në drejtim të Tiranës dhe anasjelltas.
Ndërkohë një automjet ka rrëshqitur për shkak të ngricës dhe ka përfunduar i batuar anës rrugës. “Rruga e Arbrit” u hap sot zyrtarisht, ndërsa në inaugurimin e saj mori pjesë dhe kryeministri Edi Rama.
Ndërsa Kreu i Emergjencave Civile Haki Çako është shprehur se situata e krijuar nga moti i keq është përgjithësisht nën kontroll. Në një lidhje me Klan News, Çako ka folur gjithashtu edhe për bllokimin e rrugës së Arbrit, duke fajësuar banorët të cilët janë dyndur drejt këtij aksi ditën e sotme. Ai ka shtuar se operatorët po punojnë nga të dyja krahët për të zhbllokuar kalimin.
“Situata në përgjithësi është nën kontroll. Akset më shqetësuese mbeten ato të zonës së Dibrës, por edhe rruga e Kombit, e cila ka filluar një reshje e lehtë dëbore. Po punohet me operatorët për të siguruar lëvizjen e lirë të tyre. Më duhet të sqaroj edhe çështjen e bllokimit të Rrugës së Arbrit ku ka pasur një tendencë pas hapjes për t’u dyndur drejt kësaj rruge. Operatorët janë duke punuar, në të dyja krahët janë marrë masa,” tha Çako.
