Me ndarjen para kohe nga jeta të deputetit Bashkim Fino, i renditur i katërti në listën e qarkut të Fierit, emri i tij është hequr nga fleta e votimit për këtë qark.
Duke qenë se Kodi i ri elektoral jo vetëm nuk parashikon sesi procedohet në një rast të tillë, por tanimë listat e kandidatëve për deputetë janë certifikuar nga Komisioni Qendror i Zgjedhjeve.
Nisur nga kjo, kryekomisioneri Ilirjan Celibashi ka hartuar fletë votimi ku vendi i 4-t që i përkiste të ndjerit Fino, është bosh. Kandidatët vijues të PS do të ruajnë të njëjtat pozicione si më parë.
Si në variantin e fletës me emra, ashtu edhe në atë me numra, vendi i 4-t është bosh dhe votuesit nuk i ofrohet asnjë emër për tu zgjedhur. Nëse dikush do të vendosë kryq në ato hapësira të bardha, vota nuk llogaritet për askënd.
Mbledhja e Komisionit Rregullator për miratimin e përmbajtjes së fletës së votmit për zgjedhjet e 25 prillit ka përfunduar pa rezultat ditën e djeshme. Vendimi për 3 fletët e votimit të prezantuara nga Ilirjan Celibashi do të votohen sot, duke përcaktuar kështu mënyrën sesi do të votojnë shqiptarët në zgjedhjet e 25 prillit 2021.
Pika në të cilën mazhoranca dhe opozita nuk bien dakord është për identifikim e kandidatëve për deputetë.
Partia Socialiste këmbëngul në identifikimin e tyre me numra ndërsa Parti Demokratike me emra. Debati duket se po shkon drejt identifikimit të kandidatëve për deputetë me emra.
Diskutimit me emra apo me numra do t’i japë fund Komisioni Rregullator, në mbledhjen e pasdites.
Vendimmarrja e tyre është prirë nga diskutime me përfaqësuesit politik dhe komisionerit shtetëror të zgjedhjeve Ilirjan Celibashi, për të dakordësuar përmbajtjen e fletës së votimit, për aq kohë sa miratimi i saj kërkon votën e katër prej anëtarëve të Komisionit Rregullator.
