Ministrja e Shëndetësisë dhe Mbrojtjes Sociale, Ogerta Manastirliu, nëpërmjet një statusi në rrjetet sociale, tregon se punësimi i mjekëve specialistë në Spitalin Rajonal të Kukësit, ka përmirësuar ndjeshëm shërbimin për banorët e këtij qarku. Më pas, ministrja e Shëndetësisë sqaron se së shpejti, pritet të finalizohet faza e parë e investimit me urgjencën dhe sallat e reja të kirurgjisë, duke vijuar më pas sipas saj, me rehabilitimin e plotë të spitalit.
Postimi i plotë i Ogerta Manastirliut:
“Punësimi i mjekëve specialistë në Spitalin Rajonal të Kukësit, ka rikthyer e forcuar shërbimin në specialitete të munguara më parë.
Mjekët e rinj, dr. Eljona Xhelili, kirurge e përgjithshme, dr. Anisa Muka, obstetër-gjinekologe, dr. Eliana Avllaj, pneumologe, dr. Erind Cafi, nefrolog, të cilët i janë bashkuar ekipit të Spitalit të Kukësit, po bëjnë një punë fantastike për banorët e qarkut verilindor.
Së shpejti, finalizojmë fazën e parë të investimit, me urgjencën dhe sallat e reja të kirurgjisë, për të vijuar me maternitetin e ri dhe rehabilitimin e plotë të spitalit”, shkroi Manastirliu.
Vitet e fundit, qarku i Kukësit është shpallur si më i varfëri në Shqipëri dhe banorët e këtij qarku e kanë pasur gjithmonë të pamundur të marrin shërbimet mjekësore në klikina private, pikërisht prej mungesës së anës ekonomike. Çdo investim në spitalin shtetëror, është një plus i madh për banorët e zonës.
