Të enjten Kuvendi pritet të miratojë ligjin për ratifikimin e kontratës financiare ndërmjet Bankës Europiane të Investimeve dhe Këshillit të Ministrave.
Bëhet fjalë për një kredi prej 8 milion eurosh, që do të shërbejë për rehabilitimin e Lanës, shkruan “Monitor”.
Me anë të këtij projekti, synohet zgjatimi i bulevardit nga Ura Teknologjike, deri në kryqëzimin me rrugën “Teodor Keko” dhe gjithashtu do të bëhet rehabilitimi i shtratit për këtë segment.
Banka e Investimeve do të akordojë edhe një grant prej 2.4 milio eurosh, ndërsa plani i veprimit dhe implementimit të projektit do të mbulohet nga shpenzimet buxhetore të Bashkisë së Tiranës, të ndara në 3 vite, duke filluar që nga aktuali.
Sipas projektit, duhet të parashikohen dy ura mbi shtratin e ri të lumit, për nevojat e zhvillimit urban.
Zona ku do të ndërhyhet ka një sipërfaqe prej 110 ha.
Ndërkohë përgjatë shtratit të lumit ndodhen edhe disa ndërtime informale, që kanë mangësi të theksuara në lidhje me infrastrukturën inxhinierike dhe sociale, si dhe furnizohen me ujë pusi, i cili mund të jetë i ndotur.
Njëkohësisht edhe infrastruktura rrugore është rastësore dhe nuk lidhet me asnjë linjë të transportit publik.
