Tatiana Haxhiaj, 60 vjeçe, gruaja e Andrea Haxhiajt ka ndërruar jetë në spitalin e Traumës, një javë pasi u shtrua. Gruaja erdhi në Tiranë, më datë 3 gusht, ditë kur edhe humbi të shoqin mes flakëve. Tatiana Haxhiaj kishte djegie në 70% të trupit të saj dhe nuk u ka mbijetuar dot plagëve të marra. Vdekja e saj ka shënuar viktimën e dytë në vendin tonë për shkak të zjarreve, që prej plot 19 ditësh kanë përfshirë vendin.
Tre ditë më parë, 60-vjeçari Andrea Haxhiaj, banues në fshatin Asim Zeneli në Gjirokastër, ndërroi jetë brenda në banesën e tij, që u përfshi nga flakët. Për vdeken e Andrea Haxhiaj, kreu i Emergjencave Civile, Haki Çako e komentoi si pasojë e precipitimit të shpejtë të situatës.
Gjatë këtyre 19 ditëve ku Shqipëria është përfshirë nga flakët, ka pasur disa qytetarë të lënduar, teksa viktima kanë mbetur vetëm çifti fatkeq. Ministri i Mbrojtjes, Niko Peleshi, u shpreh pak ditë më parë se në qiellin shqiptar është parë vetëm një helikopter që qarkullon për të shuar flakët.
Gjithashtu, Peleshi tha se do të donte që të kishin 100 apo 200 helikopterë, por në të vërtetë kaq kanë, vetëm dy. Dhe helikopteri tjetër, sipas Peleshit është për remont pasi i ka mbaruar orët e punës. Pra, Shqipëria ka pritur ndihmat nga BE dhe Amerika, që të neutralizohen zjarret.
