Për të gjithë maturantët të cilët dëshirojnë të vazhdojnë studimet në universitetet e vendit por ende nuk janë regjistruar, janë shpallur datat për aplikimin dhe plotësimin e formularëve A1/A1Z.
Nga dita e sotme deri më 13 shtator 2021 hapet Portali i Maturës Shtetërore online për aplikime, për të gjithë kandidatët që nuk kanë aplikuar me formularin A1Z në Portalin e Maturës Shtetërore 2021.
Në një postim në rrjetin social ‘facebook’, këtë gjë e ka konfirmuar edhe ministra e Arsimit, Sportit dhe Rinisë, Evis Kushi e cila shkruan se mundësitë për të aplikuar janë nga data 8-13 shtator. Plotësimi online i Formularit A1Z do të kryhet në shkollat ku maturantët apo kandidatët kanë kryer arsimin e mesëm të lartë ose në shkollën e përcaktuar nga KMSH-ja e vendbanimit, nëse shkolla e mesme që kanë përfunduar është mbyllur.
Ky aplikim është vetëm për kandidatët që kanë përfunduar të gjitha detyrimet e maturës shtetërore dhe plotësojnë formularin vetëm për aplikim në institucionet e arsimit te lartë.
Postimi i Plotë nga ministrja e Arsimit, Rinisë dhe Sportit, Evis Kushi
Mundësi e re për të plotësuar formularin A1/A1Z
Pas kërkesave të shumta të të rinjve që kanë përfunduar maturën dhe ende nuk kanë plotësuar formularët A1/A1Z, i ftoj të shfrytëzojnë mundësinë për të kryer këtë aplikim në datat 8-13 shtator 2021.
Suksese të gjithëve!
