Nuk pranojnë burgun e sigurisë lartë kallëzojnë penalisht ish-kryeprokuroren Arta Marku dhe ish-drejtuesen e Prokurorisë së Krimeve të Rënda, Donika Prela. Ata janë Emiljano Shullazi dhe Gilmano Dani, të akuzuar dhe të dënuar për shumë krime.
Kallëzimi për dy zyrtaret e larta të drejtësisë është bërë për “shpërdorim detyre”.
“Ne, kallëzuesit, Emiljano Shullazi dhe Gilmando Dani, jemi duke u gjykuar në Gjykatën e Posaçme te Apelit për Korrupsionin dhe Krimin e Organizuar, Tiranë.
Me Urdhrat respektivë Nr. 253 dhe 255, datë 28.07.2020, të Ministrit të Drejtësisë, jemi vendosur në regjimin e posaçëm të ushtrimit të të drejtave, në burgun e sigurisë së lartë pranë Institucionit të Ekzekutimit të Vendimeve Penale “ Jordan Misja”, Tiranë. Urdhrat e Ministrit të Drejtësisë, janë ankimuar në Gjykaten e Posacme Kundër Korrupsionit dhe Krimit të Organizuar, si të kundraligjshëm dhe abuzive. Sipas ligjit të kohës kur kanë dalë Urdhrat e Ministrit të Drejtësisë, por edhe sipas ligjit të ri, ky i fundit vepron mbi kërkesën e arsyetuar e cila duhet t’i paraqitet Ministrit nga Drejtuesi i Prokurorisë së Posaçme. Prokuroria e Posaçme për Korrupsionin dhe Krimin e Organizuar është krijuar në datën 19 dhjetor 2019, kur tetë prokurorë të emëruar në SPAK janë betuar para Presidentit të Republikës së Shqipërisë. Në rastin e të dy Urdhrave të Ministrit të Drejtësisë, kërkesa dhe inicimi i procedurës është bërë nga Drejtuesja e Prokurorisë pranë Gjykatës së Shkallës së Parë për Krimet e Rënda, e kallëzuara Donika Prela, e cila nuk e kishte kompetencën për të inicuar nje procedurë të tillë.
E kallëzuara Arta Marku, në kundërshtim me përmbushjen e rregullt të detyrës nga ana e saj, në shkelje të Kushtetutës së Republikes së Shqipërisë, ka nxjerrë Udhëzimin Nr.02, datë 24.05.2019 “ Për zbatimin e ligjit lidhur me Regjimin e Posaçëm në Burgun e Sigurisë së Lartë”, shkruhet në kallëzim.
Ish-kryeprokurorja, Arta Marku, është momentalisht me detyrë si prokurore në Gjykatën e Apelit të Tiranës. Ndërsa Donika Prela u shkarkua pasi nuk kaloi shkallën e dytë të vetting-ut, për shkak të problemeve të vërejtura në pasuritë e saj, thuhet ndër të tjera në padinë e tyre.
/GazetaReforma.com/
