Partia Socialiste i ka dërguar zyrtarisht letër Partisë Demokratike në lidhje me mbledhjen e Komisionit të Reformës Zgjedhore.
Sekretari i Përgjithshëm i PS-së i ka dërguar letër homologut të tij të PD-së.
Damian Gjiknuri e Rudina Hajdari, dy bashkëkryetarët e komisionit të formatuar të reformës zgjedhore, pas djegies së mandateve nga deputetët e opozitës, do zhvillojnë të martën mbledhjen e parë të tij. Ndërkohë përmes një letre drejtuar PD-së, ku informojnë mbledhjen e Komisionit, sekretari i Përgjithshëm i Kuvendit, Genci Gjoncaj, kërkon nga demokratët të dërgojnë emrin e vëzhguesit, i cili sipas ndryshimeve të miratuara në seancë plenare, do të gëzojë të njëjtat të drejta që u përkasin dy bashkëkryetarëve.
“Jeni të ftuar të caktoni një përfaqësues të subjektit tuaj politik, për të marrë pjesë në mbledhjen e Komisionit” – thuhet në letrën që Kuvendi i dërgon sekretarit të përgjithshëm të PD-së, Gazmend Bardhi.
Komisioni i Reformës zgjedhore do të mblidhet ditën e martë në 17:00 në Kryesinë e Kuvendit, mbledhje në të cilën pritet të miratohen axhenda e punës së komisionit në vijim, ekspertët pranë këtij komisioni si edhe kërkesa për mbështetje me ekspertizë nga OSBE për sistemin zgjedhor.
