Ambasadorja e Shteteve të Bashkuara të Amerikës, Yuri Kim ka paralajmëruar se po vijnë raste të vështira për Gjykatën Kushtetuese. Në një postim në Twitter, Kim shkruan se kjo gjykatë u bë funksionale në dhjetor të vitit 2020. Ajo thotë se Reforma në Drejtësi është e vërtetë, ndërsa ka shprehur mbështetjen e SHBA-ve për Shqipërinë derisa sistemi i drejtësisë të jetë plotësisht funksional.
“Pas 3 vjet paralizim, Gjykata Kushtetuese u bë funksionale në Dhjetor 2020. Që atëherë, Gjykata ka shqyrtuar100 çështje dhe ka lëshuar 25 vendime. Rastet e vështira po vijnë. Reforma në drejtësi është e vërtetë. SHBA do të jetë me Shqipërinë derisa sistemi i drejtësisë të jetë plotësisht funksional,”- shkruan Kim në Twitter.
Në një njoftim të Gjykatës Kushtetuese thuhej se janë marrë në shqyrtim 100 kërkesa; 25 prej tyre në seancë plenare, kurse për 75 është vendosur moskalimi në seancë plenare. Ndër vendimet e moskalimit, 50 prej tyre janë dhënë nga kolegjet, ndërsa 25 janë dhënë nga Mbledhja e Gjyqtarëve.
“Duke u udhëhequr nga parimet e kolegjialitetit, pavarësisë dhe paanësisë, të sanksionuara në Kushtetutë, Gjykata i ka kushtuar rëndësi të veçantë edhe zgjidhjes në një kohë sa më të shkurtër të mosmarrëveshjeve kushtetuese, sidomos përfundimit të çështjeve të mbartura, çka është bërë e mundur edhe falë përkushtimit të gjyqtarëve kushtetues. Po ashtu, një vlerë të shtuar në këtë drejtim ka pasur edhe administrimi efikas i burimeve njerëzore dhe materialeve ekzistuese të Gjykatës”, thuhej në njoftim.
