Ambasadorja amerikane në Shqipëri, Yuri Kim, i ka bërë sërish thirrje Këshillit të Emërimeve në Drejtësi (KED), Presidentit dhe Parlamentit që formimi i Gjykatës së re Kushtetuese duhet të ndodhë brenda vitit 2020.
Ditën e sotme Ambasada e SHBA-së i ka bërë sërish thirrje KED që të vazhdojë të ecë përpara dhe të arrijë që të plotësojë edhe vendin e fundit e mbetur vakant për të formuar anëtarësinë e re të Gjykatës Kushtetuese.
Kujtojmë se deri më tani janë zgjedhur 5 nga 9 anëtarë të Gjykatës Kushtetuese (GJK), ndërkohë që duhen të paktën 6 anëtarë që Gjykata të konsiderohet funksionale.
Me anë të një shënimi në rrjete sociale, ambasada ka sqaruar se Reforma në Drejtësi nuk do të jetë e lehtë, e shpejtë apo perfekte, por është duke ecur përpara./Gazetareforma.com/
