Ditën e sotme anëtari i Komisionit të Rithemelimit të Partisë Demokratike Aldo Bumçi deklaroi se si do të kryhet referendumi i 18 dhjetorit për shkarkimin e Lulzim Bashës nga posti i kryetarit të partisë në degët e rretheve ku zyrat janë mbyllur. Për “ABC News”, ish-deputeti demokrat shtoi se janë marrë ambjente të tjera në mënyrë që të shmangen konfliktet dhe përplasjet brenda degëve të PD-së gjatë mbajtjes së referendumit.
“Aty ku nuk ka pasur vullnet për të përdorur zyrën, për të evituar çdo konflikt ne kemi marrë ambjente të tjera. Ka raste dhe përshëndes kryetarët që kanë vënë në dispozicion zyrat, edhe kur ato nuk kanë qenë dakord”, bëri me dije Bumçi.
Më tej, ai përsëriti se Komisioni i Rithemelimit të PD-së do të kthehet në selinë blu pas 18 dhjetorit.
“Patjetër, Pas datës 18 kjo është selia e demokratëve. Dhe këtu do e ketë shtëpinë. Është shtëpia e të gjithë demokratëve”, u shpreh ish-deputeti Aldo Bumçi.
Ditën e sotme, u denoncua se dega e PD-së në Shkodër ishte mbyllur me zinxhir, ndërsa në Elbasan ishin ndërruar bravat e dyerve të zyrave të selisë së partisë. Referendumi për shkarkimin e Bashës nis në orën 08:00 dhe përfundon në orën 17:00 të ditës së shtunë.
