Ish-kryeministri Sali Berisha vazhdon të bëjë ‘rebelin’ ndaj institucioneve të drejtësisë në vendin tonë.
Teksa është caktuar ditën e sotme në orën 14:00 seanca për marrjen në pyetje të Berioshës, ky i fundit për mediat deklaroi se nuk do të paraqitet.
Mëngjesin e kësaj të marte, teksa po hynte në selinë blu Berisha theksoi se nuk i ka kundërshtuar kurrë vendimet e organeve të drejtësisë, por me kushtin e vetëm që ato të jenë në përputhje me Kushtetutën.
Ish-kryeministri theksoi se ligji e ndalon që të merren masa sigurie ndaj deputetëve për shkak të imunitetit dhe ndaj ai do të respektojë procedurat kushtetuese.
“Kurrë nuk kam kundërshtuar dhe s’do kundërshtoj një urdhër të organeve gjyqësore me të vetmin kusht që ato të jenë në respect të Kushtetutës. I gatshëm t’i përgjigjem çdo pyetjeje, por kurrë për vendime anti kushtetuese. Nuk e bëj për vete këtë. Jam njeriu që kam dërguar në parlament ligjin që vendoste barazin e plotë midis çdo zyrtari dhe qytetari në Kushtetutë, këtë ligj e ktheu me forcën e kartonit Edi Rama. Jam gati ta votoj nesër, por përderisa është në Kushtetutë nuk mund të pranojë asnjë lloj kompromisi për ta shkelur atë. Përkundrazi po konsultohem me juristë dhe të tjerë, që të ndërmarr të gjithë hapat e tjerë në mbrojtje të Kushtetutës. Në çdo kohë, unë jam i gatshëm të paraqitem, siç jam paraqitur kur më kanë thirrur, për t’u pyetur dhe për çdo gjë.
E vetmja gjë, që nuk mund të pranoj kurrë, të shkel Kushtetutën e vendit. Të ndryshojmë Kushtetutën e vendit, jam autori i ligjit, që kjo mbrojtje nuk duhet të ekzistojë. Nuk duhet të ekzistojë, duhet të jenë të gjithë të barabartë. Hajde atëherë të ndryshojmë Kushtetutën, por jo ta menderosim Kushtetutën. Për atë nuk jam dakord. Sa kureshtje keni ju, unë besoj se me këto që u përgjigjem, jam korrekt fare. Pra, piramida e trillimit, e mashtrimit dhe e falsifikimit do të shembet. Dhe ju garantoj ju siç ka ndodhur, e bazuar gjithçka në falsifikim, fshehje dokumentesh dhe mashtrime. Kurse, nuk pengoj asnjë proces gjyqësor, hetimor, etj. E vetmja gjë, kjo është totalisht një formalitet, por një formalitet që buron nga Kushtetuta e vendit dhe unë nuk mund ta shkel”, u shpreh Berisha.
