Lëvizja për Universitetin e ka cilësuar qesharake deklaratën e ministers së Arsimit, Evis Kushi për provimet online. Në një qëndrim në rrjetet sociale Lëvizja shkruan se ministrja e ka harruar se gjaët gjithë kësaj kohe studentët kanë pasur mungesë interneti dhe qeveria nuk ka ndërmarrë asnjë veprim për t’i ndihmuar. Ndër të tjera në reagim thuhet se e vetmja zgjidhje që studentët të mos penalizohen është mbajtja e provimeve në auditore dhe ministria duhet të sigurojë infrastrukturën e nevojshme e mbi të gjitha të anulojë menjëherë traifat e studimit.
Reagimi i plotë i Lëvizjes për Universitetin:
DEKLARATA QESHARAKE E MINISTRES MBI PROVIMET ONLINE!
Pas një semestri të plotë akademik, ministrja e Arsimit dha dje një deklaratë për sezonin e provimeve dhe mësimin online. Ministrja harroi që gjatë kësaj kohe shumë studentë e kanë pasur të pamundur të kenë qasje në internet dhe qeveria nuk ka ndërmarrë asnjë lehtësim për sigurimin e pajisjeve elektronike dhe kostove të larta të internetit.
Në një kohë kur ministrja do të duhej të mbante qëndrim për tarifat universitare, të cilat as janë ulur e as janë hequr, ajo merr detyrën e burokratëve universitarë dhe deklaron se studentët nuk duhet të penalizohen nga mungesat në leksione dhe seminare. Nëse do të ruhej ajo pak autonomi universitare, ky vendim do të duhej të merrej nga rektorët e të gjithë universiteteve publike, të cilët janë kthyer në marioneta të qeverisë që zbatojnë vendimet e ardhura nga lart.
Për të mos u thelluar penalizimi i studentëve, do të duhet që të gjitha provimet të kryhen në auditorë. Përgjegjësi e Ministrisë duhet të jetë sigurimi i infrastrukturës së nevojshme për zhvillimin e provimeve në klasa dhe anulimi i menjëhershëm i tarifave studentore. Vështirësitë e panumërta që kemi hasur gjatë mësimit online nuk zhbëhen vetëm me një premtim bosh për anulimin e mungesave.
Me t’u rikthyer në fakultete, organizimi ynë do të intensifikohet deri në ndërtimin e një universiteti të denjë, demokratik dhe pa tarifa.
#PërUniversitetin#PërShoqërinë
Vendimi për zhvillimin e provimeve online ka hasur në kundërshti të shumta nga studentët të cilët thonë se do të penalizohen dhe nuk do të vlerësohen sipas meritës. Ata i kanë cilësuar diskriminuese dhe përjashtuese dhe kanë kërkuar mbajtjen e sezonit në auditore. Ditën e djeshme ministra e Arsimit, Evis Kushi tha në një deklaratë se studentët nuk duhet të penalizohen nga mungesat e marra gjatë mësimit online dhe se për ata që nuk kanë mundësi të marrin pjesë në provime duhet të krijohet një sezon i dytë. Me sa duket studentët nuk janë bindur nga këto deklarta dhe kanë kërkuar që t’i bëjnë provimet nëpër klasa.
