Albin Kurti ka reaguar për certifikimit të zgjedhjeve nga KQZ në Kosovë, ku Lëvizja Vetvendosje u shpall fituese me 50.28% të votave. Në një postim në Facebook Kurti shkruan se kjo është një ditë e mirë për Republikën dhe shans i madh për Kosovën. Ai falenderon të gjithë ata që votuan Vetëvendosjen dhe thotë se fitorja është e secilit prej tyre. “Fituam KREJT, ecim DREJT”, shkruan Kurti.
Postimi i plotë:
“Çertifikimi i rezultateve u bë sot. Fitoi referendumi, fituam në referendum: 50,28%. Ditë e mirë për Republikën. Shans i madh për Kosovën. Ju falemnderit të gjithë qytetarëve dhe mërgatës për votën e tyre me 14 shkurt, të gjithë anëtarëve e aktivistëve të Lëvizjes VETËVENDOSJE! për punën dhe angazhimin e tyre, të gjithë kandidatëve të listës sonë 127 për përfaqësimin dhe kontributin e tyre. U jam mirënjohës përzemërsisht e përjetësisht të gjithëve. Fitorja është e secilit prej jush. Fituam KREJT, ecim DREJT. Urime!”-ka shkruar ai.
Zgjedhjet e parakohshme të 14 shkurtit u certifikuan sot në Kosovë nga KQZ, ndërsa LVV e Albin Kurtit u shpall fituese me 50.28 për qind të votave. Tashmë presidenti i Kosovës, në këtë rast Vjosa osmani, ka për detyrë të thërrasë brenda 30 ditësh seancën e parë në Kuvend, për t’i hapur rrugë krijimit të institucioneve të reja.
