Prokuroria e Tiranës ka intensifikuar hetimet për vrasjen e Martin Canit dhe plagosjen e Luis Mecjas, duke zhvilluar një seancë të gjatë marrje në pyetje me autorin e dyshuar. M.P, i cili mbahet si përgjegjës për ngjarjen e rëndë pranë shkollës “Fan Noli”, ka qëndruar për më shumë se 8 orë në ambientet e prokurorisë ditën e shtunë, më 28 nëntor.
Sipas “Vna”, gjatë seancës hetimore, M.P ka dhënë shpjegime të hollësishme për ngjarjen dhe është ballafaquar me të miturit e tjerë që ishin të pranishëm në vendngjarje. Paralelisht, prokuroria ka organizuar edhe një ballafaqim mes Luis Mecjas dhe djalit të tezes së tij. Në këtë ballafaqim, kushëriri i Luisit ka konfirmuar prezencën e vetëm një autori të dyshuar dhe ka pranuar se ka goditur me grusht të miturin K.B, duke i shkaktuar dëmtim në nofull.
Masa e sigurisë “arrest me burg” vazhdon të jetë në fuqi për M.P, i cili akuzohet për vrasje për shkak të cilësive të veçanta të viktimës. Burime pranë mbrojtjes bëjnë me dije se avokati i tij pritet të ankimojë masën e sigurisë.
Ngjarja, ku Martin Cani humbi jetën nga goditjet me thikë dhe miku i tij Luis Mecja mbeti i plagosur pas një konflikti mes të miturish, ka shkaktuar tronditje të thellë në opinionin publik. Si pasojë, janë organizuar protesta me kërkesën për shkolla më të sigurta, ndërsa prokuroria vazhdon hetimet për zbardhjen e plotë të rrethanave.
