Rastin e Konstandin Xhuvanit e kujtojmë të gjithë, kur në shkurt të 2014 në Tiranë, vrau 4 veta në një lokal në rrugën e Elbasanit.
Djali i ish-deputetes së PS njëherësh aktores së njohur Luiza Xhuvani u dënua me 35 vite burg për ngjarjen në fjalë.
Por Xhuvani u rikthye në vëmendjen e mediave kur doli në dritë dhe akuza për “armëmbajtje pa leje”.
Kjo pasi prokuroria e Gjirokastrës gjatë një hetimi 5 vjeçar, ka arritur të zbulojë se pistoleta e përdorur në konfliktin me disa të rinj në Gjirokastër, nga ku Xhuvani doli “pa u lagur”, dhe arma me të cilin ai vrau 4 persona më vonë në Tiranë, Edison Jahon, Enea Xhajn, Arbër Demirajn dhe shtetasin italian Gianpaolo Azzola, janë e njëjta dhe i përkasin atij, sipas BIRN.
Çështja në ngarkim të Xhuvanit është dërguar që prej ditës së premte në gjykatën e Gjirokastrës për akuzën e “Mbajtjes pa lejë të armëve dhe municionit”, ndërkohë i pandehur për këtë çështje është marë dhe një nga infermierët e spitalit Psikiatrik në Elbasan, Kujtim Budani, i cili rezulton të ketë kryer veprën penale të “Falsifikimit të dokumentave”.
Kjo dosje penale është hapur dhe mbyllur disa herë nga prokuroria, por këtë herë pas disa verifikimeve të imtësishme, prokuroria ka arritur të zbulojë të gjithë kronologjinë e këtij krimi të ndodhur në Gjirokastër.
Kryerja e eskpertizës balistike të armës që përdori Xhuvani në masakrën e katërfishtë në Tiranë me tre gëzhojat e sekuestruara në ngjarjen e Gjirokastrës rezultoi se ishte e njëjtë me armën që u përdor në ngjarjen e 25 prillit të po atij viti në Gjirokastër.
