Një tjetër ngjarje e rëndë është regjistruar këtë të premte në qarkun e Korçës, ku një 20-vjeçar ka gjetur vdekjen në rrethana tragjike. I riu është gjetur i vetëvarur në fshatin Rrëmenj të Pogradecit, ndërsa ngjarja ka ndodhur vetëm pak orë pas një vetëvrasjeje tjetër në të njëjtin qark.
Familjarët e 20-vjeçarit kanë qenë të parët që kanë konstatuar trupin e pajetë dhe kanë njoftuar menjëherë policinë. Uniformat blu kanë mbërritur në vendngjarje, ku po kryejnë veprimet hetimore për të zbardhur plotësisht rrethanat e këtij akti të rëndë. Deri tani nuk janë dhënë detaje të tjera mbi shkaqet që mund ta kenë shtyrë të riun drejt vetëvrasjes.
Kjo është ngjarja e dytë e kësaj natyre që ndodh brenda pak orësh në qarkun e Korçës. Më herët gjatë ditës, në fshatin Sovjan të Maliqit, një 37-vjeçar u gjet i vetëvarur në një magazinë nga familjarët e tij. Sipas informacioneve paraprake, në trupin e viktimës nuk u evidentuan shenja dhune, ndërsa të afërmit deklaruan se nuk kishte pasur konflikte apo probleme të njohura.
Dy rastet e njëpasnjëshme kanë tronditur opinionin publik dhe kanë ngritur shqetësime mbi shëndetin mendor dhe nevojën për ndërhyrje më të thelluar sociale në komunitetet lokale. Hetimet për të dyja rastet vijojnë.
