Jorida Tabaku, ish-deputetja e PD-së ka ngritur alarmin për nivelin e korrupsionit në vendin tonë.
Duke iu referua raportit të “Transparency International” Tabaku u shpreh se Shqipëria është me plot gojën në listën e zezë të korrupsionit. Sipas saj ky është një konstatim jo veç i opozitës por edhe i një raporti të dedikuar të TI, një institucioni i specializuar për korrupsion.
Përmes një postimi në rrjetin social Facebook ajo vuri në dukje se pavarësisht “të dhënave pozitive” që paraqet propaganda qeveritare, raporti i “TI” tregon të kundërtën. Tabaku u shpreh e bindur se më 25 prill shqiptarët do t’i japin fund këtij modeli kriminal që qeveris duke grabitur shqiptarët.
Reagimi i Jorida Tabakut:
Sot qeverisja bëhet nga grupe kriminale të strukturuara, sot ligjet shkruhen e kalohen nga interesa të ngushta klienteliste dhe sot interesat kriminale vendosin për ndarje tenderash e koncesionesh.
Raporti vlereson se raste si ai i Vangjush Dakos që ka përfshirë grupe kriminale në blerje votash, ai i Tahirit me përfshirjen me trafikun ndërkombëtar të drogës, rasti i ligjit te lojerave te fatit ku qeveria mbështeti qartësisht grupet kriminale dhe favorizoi klientët e saj janë shembuj të qartë të kapjes së shtetit.
Në raport përmenden dhe rasti i rrugës Milot-Balldren të cilën e ka denoncuar dhe opozita. Një rast flagrant ku kostot janë 3 fishuar, ku eshte fituar pa garë, me kosto pothuajse 20 mln euro për km, në një tender që qartësisht mund të ishte zhvilluar dhe fituar një kompani me 1/3 e vlerës.
Korrupsioni ka kapur në çdo qelizë qeverisjes sepse kjo bandë ka bashkëjetuar me korrupsionin, krimin dhe ligjet speciale në favor të oligarkëve. Kjo bandë ka vrarë shpresën, detyron rininë të emigrojë edhe të shfrytëzohet nga grupet kriminale, që sot pengojnë ekonominë e zhvillimit.
Një model kriminal që do të shkëputemi më 25 prill kur Shqiptarët do të votojnë qartazi kundër këtij tarafi kriminal që na qeveris. Shqipëria do të shpëtojë nga dara e korrupsionit një herë e mirë në 25 prill 2021, ku ne së bashku do të ndryshojme faqen e Shqipërisë vendit më të korruptuar në rajon.
Shqiptarët e heshtur dhe punëtorë, qytetarët e ndershëm të këtij vendi, viktima të këtij pushteti do të jenë në radhë për të rrëzuar këtë qeveri përmes votës. Së bashku do t’ia dalim./Gazetareforma.com/
