Është publikuar ditën e sotme raporti dy vjetor i Kombeve të Bashkuara mbi e-Qeverisjen ose qeverisjen dixhitale.
Në raportin global të Organziatës së Kombeve të Bashkuara, platforma e Bashkëqeverisjes “Shqipëria që Duam” dhe “E-Albania”, që ofrojnë shërbime pa pagesë, 24 në 24 orë, theksohet se kanë pësuar një rritje të paprecedentë.Ky vlerësim mbështetet nga dy tregues; e-sherbimet dhe e-pjesëmarrja. Kujtojmë se në raportin e vitit 2018, Shqipëria renditej në vendin e 62 sa i takon shërbimeve, ndërkohë që sot është me pikë të barabarta me Kanadanë, ndërsa lë pas vende si Italia, Zvicra dhe Greqia.
Ndërkaq, drejtoresha e Agjencisë Kombëtare të Shoqërisë së Informacionit, Linda Karçanaj, ka bërë një analizë të klasifikimit të Shqipërisë në këtë raport.
“Ngjitja në këtë klasifikim është arritur përmes 2 treguesve: e-shërbimet dhe e-pjesëmarrja.Konkretisht për e-shërbimet: Kemi qenë në vendin e 62-të në vitin 2018, dhe jemi në vendin e 31-të në vitin 2020. Pra, 31 vende ngjitje në klasifikim në vetëm dy vite dhe jemi me pikë të barabarta me Kanadanë ndërsa lemë pas shtete si Italia, Zvicra, Greqia etj.
E-pjesemarrja: Kemi qenë në vendin e 61-të në vitin 2018 dhe jemi në vendin e 36-të në vitin 2020, pra plot 25 vende ngjitje në klasifikim.Edhe këtu lemë pas Zvicrën, Italinë dhe të gjitha vendet e Ballkanit Perëndimor”, shkruan Karçanaj teksa i njeh meritat Ramës për atë që ajo e cilëson si revolucion digjital.
“Revolucioni digjital i udhëhequr nga Kryeministri, u mundësoi qytetarëve marrjen e shërbimeve publike online, përmes një kliku të vetëm në e-Albania dhe rriti pjesëmarrjen e qytetarëve në vendimmarrje përmes platformës së bashkëqeverisjes”, shkruan Karçanaj.
