Presidenti Meta, uljen e vlerësimit nga organizata Freedom House për demokracinë në Shqipëri e cilëson si një hap të vendit më pranë autoritarizmit.
Përmes një postimi në llogarinë e tij të Instagramit, Meta shkruan se ‘Freedom House’ e zbret Shqipërinë edhe më poshtë për vitin 2020, mes regjimeve hibride.
Sipas tij, shembja e Teatrit Kombëtar, dhunimi i protestuesve dhe vrasja e Klodian Rashës nuk mund të mbulohen me propagandë.
Statusi i plotë i Metës:
Shqipëria një hap më pranë autoritarizmit!
“Freedom House” e zbret Shqipërinë edhe më poshtë për vitin 2020, mes regjimeve HIBRIDE!
Shembjen e Teatrit Kombëtar për interesa klienteliste, dhunimin e protestuesve dhe vrasjen kriminale të Klodian Rashës gjatë kohës së pandemisë nuk mund t’i mbulojë asnjë propagandë. Këto dhe të tjera ngjarje të rënda kurrë nuk do të amnistohen dhe për to drejtësia do vendoset në vend.
Përkeqësimi i të gjithë treguesve, veçanërisht shkelja mizore e të drejtave të njeriut, është një kambanë e fortë alarmi për instalimin e shtetit policor, që e kam denoncuar prej kohësh.
Referendumi i 25 prillit 2021 është momenti historik për t’i dhënë një trajektore të re të demokracisë, shtetit ligjor dhe respektimit të të drejtave të njeriut, me qëllim përmbushjen sa më parë të kushteve të vendosura nga Bashkimi Europian.
