Në një raport të publikuar nga Europol në lidhje me grupet kriminale, sqarohet se kompanitë e transportit të bananeve përdoren si mjet për të fshehur trafikun e kokainës. Në raport përmendet rasti i një biznesmeni italian me origjinë argjentinase, i cili përdori kompaninë e tij për të kryer veprimtari kriminale, duke përfshirë trafikun e drogës dhe pastrimin e parave. Ai menaxhon disa biznese, duke përfshirë një importues të bananeve nga Ekuadori në BE.
Bashkëpunëtori i tij, një shqiptar me qendër në Ekuador, është përgjegjës për importin e kokainës nga Kolumbia dhe për shpërndarjen e saj në BE. Kompanitë e frutave ekuadoriane përdoren si një mjet për të maskuar këto veprime kriminale, sipas raportit të Europol.
“Kreu i një rrjeti kriminal, një biznesmen italian me origjinë argjentinase me banim në Marbella, përdori kompaninë e tij për të fshehur si trafikun e drogës ashtu edhe aktivitetet e pastrimit të parave. Ai menaxhon disa kompani, duke përfshirë një importues të bananeve nga Ekuadori në BE.
Ai gjithashtu zotëron qendra sportive në Marbella, qendra komerciale në Granada dhe bare dhe restorante të shumta. Një bashkëpunëtor shqiptar, me qendër në Ekuador, kujdeset për importin e kokainës nga Kolumbia në Ekuador dhe shpërndarjen e mëvonshme në BE. Kompanitë e frutave ekuadoriane përdoren si front për këto veprimtari kriminale”, thuhet në raport.
