Shqipëria është renditur e para në rajon për qeverisjen dixhitale, duke lënë pas edhe disa shtete të Bashkimit Evropian. Nga 51 shtete që merr në studim raporti, vendi ynë renditet i 17.
Vlerësimi ka ardhur në raportin e Bankës Europiane për Rindërtim dhe Zhvillim (BERZH) për vitin 2021-2022.
Në krahasim me vitin 2015, Shqipëria ka rikuperuar 16 pozicione në e-qeverisje dhe lë pas gjithë Ballkanin Perëndimor bashkë me disa shtete të BE-së si Gjermania, Italia, Greqia, Hungaria etj.
Treguesi i e-qeverisjes për të cilin është vlerësuar Shqipëria përfshin informacionin online për ligjet, nismat apo shpenzimet publike, shërbimet elektronike të disponueshme për publikun si dhe pjesëmarrja elektronike, konsultimet me palët e interesuara në lidhje me iniciativat apo projektet e reja.
Kryeministri Edi Rama ka publikuar raportin e BERZH, ku Shqipëria ngjitet tashmë në vendin e 17-të për shërbimet digjitale dhe del e para në rajon.
Rama përmes një postimi në rrjetet sociale shprehet se në 30 prill do të mbyllen sportelet e shërbimeve me dokumente duke i dhënë sipas tij një “shqelm vendimtar” korrupsionit, radhëve apo zvarritjeve për marrjen e një dokumenti shtetëror.
Postimi i Ramës:
Nga e 33-ta Shqipëria ngjitet në vendin e 17-të për shërbimet digjitale dhe del e para në rajon
Në 30 prill mbyllim sportelet e shërbimeve me dokumenta dhe i japim një shqelm vendimtar korrupsionit, radhave, zvarritjeve për marrjen e një dokumenti shtetëror
