Edi Rama duket se ka mbetur “i zhgënjyer” nga listat e kandidatëve për deputetë të Partisë Socialiste. Gjatë konferencës për shtyp të mbajtur ditën e sotme ai tha se nuk e besonte që ky ishte maksimumi i PD dhe se lista e tyre është afrim i fosilizimit. Ndërsa për listën e LSI ai nuk ka dashur të komentojë. Rama u shpreh se lista e LSI është lista e SPAK dhe OFL-së.
“Skuadra e PD është zhgënjyese edhe për mua. Nuk besoj që ky ishte maksimumi që mund të bënte PD pavarësisht situatës së vështirë që ndodhet për shkak të lidershipit pa karakter. Nuk besoj se rrethi i influencës së PD-së të jetë aq i ngushtë dhe mos të ketë mundësi që të ofrojë më shumë se sa kaq. Nëse lista e PS është fuqia e vetendryshimit, lista e PD-së është afirmimi i fosilizimit. Ndërsa për listën e LSI nuk dua që të humbasë kohë. Ajo është lista e SPAK dhe OFL-së. Nuk ishte si të ishte ndryshe dhe më vjen keq për shumë të rinj dhe të reja që natyrisht nuk i përkasin këtij kategorizimi, por janë enturazh si mezetë rreth karkalecave të tiganit të Monikës. Karkalecat janë në qendër dhe është thjesht një afirmim i një katandie keq e mos me keq, të një force politike që ka luajtur rolet e saj në proceset demokratike të Shqipërisë dhe sot është një magazinë private që administrohet nga gruaja e presidentit dhe shet dokrra e blen vota”, tha Rama.
Ai ka komentuar edhe kandidatët e Tiranës duke thënë se ndihet i zhgënjyer me listën në këtë qark. Rama tha se mes Luljeta Bozos dhe Sali Berishës, qytetarët do zgjidhnin të parën sepse Berisha është përfaqësues i pensionistëve të krahut të djathtë dhe nuk ka për çfarë t’i përfaqësojë.
“Është katastrofë, jam shumë i keqardhur dhe i zhgënjyer. Qytetarët e Tiranës kanë mundësinë të zgjedhin mes Luljeta Bozos dhe Sali Berishës dhe do zgjedhin Saliun? Kjo është e reja që sjell PD për pensionistë? Sali Berisha? Se ai është përfaqësuesi i pensionistëve në krahun e djathtë. Për çfarë do i përfaqësojë ai pensionistët, për t’i marrë e për t’i nxjerrë që të djegin palma? Shumë e habitshme. Kjo është çështje e një fenomeni, nuk dua të përmend emra të tjerë”, ka thënë kryeministri.
