Kryeministri Edi Rama ka reaguar për paraqitjen e peshëngritësit Briken Calja në Lojërat Olimpike, ku mori vendin e katërt. Në një status në Facebook, Rama shkruan se Brikeni meriton një bravo të madhe për renditjen në atë pozicion në Olimpiadë, edhe pse pa medalje.
“Edhe pse pa medalje për vetëm 1kg diferencë, Brikeni meriton një bravo të madhe për renditjen në vendin e katërt në Lojrat Olimpike të Tokios”, shkruan Rama.
Më herët, për performancën pozitive të Briken Caljas reagoi edhe presidenti Ilir Meta. Ai e quajti renditjen në vendin e katërt një arritje dijnitoze për Shqipërinë dhe një përfaqësim të shkëlqyer për peshëngritësin.
Briken Calja u rendit në vendin e katërt në stilin me shtytje, me vetëm një kilogramnë që e ndante nga pjesëmarrja në podium. Ai ngriti 184 kilogramë me sukses në provën e parë, për të vazhduar me 188 kg në provën e dytë, por nuk arriti ta mbante shtangën lart. Në provën e tretë Calja ia doli të ngrinte 190 kilogramë me sukses. Megjithatë ky është rezultati më i mirë për Shqipërinë deri tani në Lojërat Olimpike, për vetëm 1 kilogramë që e ndau Caljan nga medalja e bronztë, që do të ishte edhe e para për vendin tonë në një Olimpiadë.
