Qeveria ka ashpërsuar masat pas viktimës së parë të shënuar nga koronavirusi në Durrësi.
Kryeministri Edi Rama është shprehur se personat që vijnë nga Italia dhe Greqi dhe nuk respektojnë rregullat e vetëkarantinimit, do të gjobiten me 5 mijë euro.
Ndërkohë që prej ditës së nesërme, policia dhe ushtria do të ngrenë postoblloqe.
“Postblloqe për kontrolle të automjeteve dhe do të verifikojnë nëse ka të ardhur nga Italia apo Greqia në 14 ditët e fundit të cilët ndalohen të dalin nga shtëpia. Nga nesër kush prej tyre do të kapet në rrugë, do të dënohet me 5 mijë euro gjobë. do të ndalohet të largohet nesër në Itali pas ikjes së epidemisë nëse nuk do të ketë paguar gjobën. Ju kërkoj shumë ndjesë është një masë që në kushte normale do të ishte absurditet, nuk do doja kurrë t’ua kërkoja këtë. por kjo nuk është një kohë normale, futeni në kokë, është një kohë lufte me një armik që nuk duket por është rreth secilit prej nesh. Do ta kalojmë siç kaluam tragjedinë e 26 nëntorit ku dolëm më të fortë”.
Viktima e parë nga koronavirusi është e moshuara në Durrës, e cila vuante nga disa sëmundje kronike.
Ajo ishte kthyer nga Italia më 3 mars, ndërsa kishte shfaqur komplikacione me frymëmarrjen.
Aktualisht në Shqipëri numërohen 11 të infektuar nga koronavirusi, ndërsa janë marrë 157 mostra.
Që prej ditës së hënë qeveria ka marrë masa shtrënguese, për të evituar përhapjen e virusit, duke mbylluar lokalet dhe duke anuluar të gjithë grumbullimet.
