Pas komunikimit me qyetarët në Facebook, ku lajmëroi një sërë masash të reja, kryeministri Edi Rama ka folur në një intervistë për News24 për vendimet e marra dhe mbi atë që na shqetëson të gjithëve, çfarë do të ndodhë në të ardhmen.
Rama tha se për krijimin e lehtësimeve baza janë shifrat e të infektuarve dhe viktimave që parqiten në spitale, duke sqaruar se pavarësisht shifrave të qëndrueshme, mund të ketë edhe rritje të kurbës.
“Me bllokun e parë të lehtësimit që është blloku i aktiviteteve të hapura është lehtësuar puna për një pjesë të konsiderueshme të sektorit të punës privat në Shqipëri. me bllokun e dytë që është deklaruar se do të hapet më 27 prill janë mbi 5 mijë njerëz që kthehen në punë. Në këtë proces udhëhiqemi nga dinamika e luftës në vijën e zjarrit. Nga shifrat e infektimit dhe situata në spital. Situata në spital është nën kontroll. Kemi një numër minimal në terapi intensive dhe kjo na jep mundësi të shikojmë për hapjen. Do të ecim javën e ardhshëm duke parë shifrat me bllokun tjetër dhe pastaj një bllok të fundit që është blloku me risk më të lartë sipas atyre që shohim që po bëjnë shtetet e tjera”, deklaroi Rama.
Sa i përket paketave ekonomike, Rama tha se bazuar në PBB ne kemi një nga paketat më domethënëse krahasuar me kapacitetet tona.
“Ka dhe një gjë tjetër që vlen të theksohet, pavarësisht se një numër i madh nga ato dy paketat kthehet në punë ne nuk do të tërheqim asnjë qindarkë mbrapsht por të gjitha pagat e premtuara do të shkojnë tek ata që janë subjekt. Taksistët do të fillojnë punë javën e ardhshme por do të vazhdojnë të marrin pagën e luftës, ashtu si punonjësit e dyqaneve, të tregjeve. Të gjithë do të marrin atë që iu takon, qoftë nëse janë kategoria më e goditur që ishte në paketën e parë qoftë kategoria tjetër që do të përfitojë 400 mijë lekë.”, u shpreh kryeministri.
Po ashtu, kreu i qeverisë sqaroi edhe një herë çështjen e riatdhesimit, duke thënë se Shqipëria akoma nuk ka hapur kufijtë, duke shtuar se për momentin është liruar një korridor, nga ku do të bëjnë fluturime njerëzit që gjenden më shumë në vështirësi, teksa shtoi se është shumë herë për të folur për hapje të kufijve.
Sipas tij, këtë verë do ketë vetëm turizëm lokal, çka është shumë mirë për vendin tonë.
E në fund, Edi Rama nuk ka harruar të falenderojë publikisht presidentin Ilir Meta për qëndrimin e mbajtur gjatë kohës së pandemisë së COVID-19, duke thënë se ka mbajtur një pozicion shumë për t’u respektuar dhe ka qenë shumë konstruktiv.
Kreu i qeverisë më tej u shpreh se Meta tani është njësh me popullin dhe po bënë gjënë e duhur e po sillet brenda rolit që i takon.
“Përplasjet e mëparshme kanë qenë të diktuara nga pozicionet e mëparshme, e po të ktheheshim nuk do i ndryshimin asgjë pozicioneve tona. Pozicioni i Presidentit në këtë situatë nuk le asgjë për të dështuar, ka qenë në rolin e tij dhe me një përmasë përgjegjshmëri dhe është për t’u respektuar plotësisht. Mos të merremi se çfarë iku, por me çfarë kemi sot, e të shohim çfarë vjen. Nuk po luftojmë për vota, por po luftojnë për jetën e njerëzve. Po të shohim nëpër botë, të gjitha opozitat që kanë vijuar këngën e vjetër kanë humbur pikë, por ato që janë bërë njësh me qeverinë janë bërë njesh me opozitë. Presidenti që ishte bërë më para njësh me opozitën, tani është bërë njësh me popullin. Po bën gjënë e duhur dhe respekt për këtë që po bënë, Unë nuk e kam problem asnjë herë ata që mendojë”, tha Rama.
