Ditën e djeshme, nisi zyrtarisht fushata elektorale e partive në vend, 30 ditë para zgjedhjeve të 25 prillit. Fushata e partive nisi me konferenca dhe me mitingje në kryeqytet, si dhe ka vazhduar gjatë gjithë kohës në rrjetet sociale, ku të gjithë krerët e partive janë shumë aktivë.
Kryeministri i vendit, Edi Rama, ka publikuar një video në faqen e tij në “Instagram”, ku tallet dhe ironizon me kundërshtarët e tij politikë. Në këtë video, Rama ka mbledhur të gjithë aktorët e politikës: Sali Berishën, Monika Kryemadhin, Lulzim Bashën e të tjerë dhe në diçitura, shkruhej:
“Mbylli sytë dhe imagjino. Imagjino sikur Dash Shehi të linte rakinë. Imagjino sikur Mona (Monika Kryemadhi), të mos e shihte më filxhanin. Imagjino sikur Iliri (Meta) me Saliun (Berisha) të riktheheshin në pushtet. Imagjino sikur Luli (Basha) të zgjohej nga gjumi”. E në këtë moment, Rama nxjerr në video dhe vetë Lulzim Bashën, i cili thotë: “Hej ngadalë, ca gjëra janë vërtetë të pamundura”. Një video-montazh ky i kreut të qeverisë që është një ironi e drejtpërdrejtë kundër rivalëve politikë.
Zgjedhjet e 25 prillit në vend do të jenë shumë të rëndësishme, ku Partia Socialiste kërkon të shkruajë historinë dhe të marrë mandatin e tretë, ndërsa aleatët opozitarë, do të kërkojnë ta largojnë Edi Ramën nga kreu i qeverisjes.
View this post on Instagram
