Kryeministri Edi Rama ka takuar ditën e sotme distributorin e vaksinës Sinovac, Canturk Alagöz. Lajmin e ka bërë publik vetë kryeministri me anë të një fotoje në rrjetet sociale, ku shkruan se e ka falenderuar Alagöz për ndihmën jetike me vaksinat. Rama bën me dije se ndër të tjera u diskutua edhe për ndërtimin e fabrikës së vaksinave në Shqipëri, si pjesë e një qendre ekselence farmaceutike.
“PHOTO OF THE DAY
***i nderuar nga mikpritja e këtij zotërie mbresëlënës, Canturk Alagöz, një personalitet i shkencës dhe biznesit turk, pronari i kompanisë së prodhimit të disa lloje vaksinash, e njëkohësisht distributori i vaksinës Sinovac, me të cilin pasi e falenderova me mirënjohje për ndihmën jetike, diskutuam për projektin e ndërtimit të fabrikës së vaksinave në Shqipëri, si pjesë e një qendre ekselence farmaceutike…
Të shohim ”, shkruan Rama.
Kujtojmë që Rama ka folur për ndërtimin e një fabrike vaksinash që me njoftimin për ardhjen e vaksinave kinezer në vendin tonë.
“Njëkohësisht kemi nisur bisedat për të sjellë në Shqipëri fabrikën për prodhimin e vaksinave. Një fabrikë të teknologjisë të lartë, e cila aktualisht është një nga kompanitë e mëdha në botë. Kompania farmaceutike që bën distribucionin e fabrikës Sinovac”, ka thënë Rama më herët.
