Teksa opozita vijon protestën sot, kryeministri Rama po zhvillon një takim me skuadrën kombëtare të negociatave për anëtarësim në Bashkimin Europian.
Për mediat Rama tha se skuadra ka bërë një punë të mirë, teksa nuk kaloi pa bërë ironi me opozitën, pasi deputetët e saj nuk e kanë vlerësuar ecurinë e procesit të integrimit të Shqipërisë në BE.
“Shqipëria po bën punë të admirueshme për negociatat. Njerëzit thonë se; në administratë ka hajdutë, dhe nuk punon kush. Skuadra shqiptare po bën një performancë të jashtëzakonshme. Ky është vetëm fillimi i procesit. Kur vjen puna për të vlerësuar pjesën tjetër për këtë kapacitet të brendshëm qeverisës, shtetin, e kemi të vështirë. E kemi të vështirë në pikën që nuk janë pak ata që thonë; ishim më mirë kur ishim më keq. Ne natyrisht e dimë dhe ju e dini më mirë se unë, pasi i keni para letrat, pasi ky është vetëm fillimi.”, tha Rama.
