Kryeministri Edi Rama ka sulmuar kreun e PD nga sheshi “Skënderbej” duke thënë se ky i fundit është kukull në duart e Sali Berishës, Liri Metës dhe Monika Kryemadhit. Rama tha se nëse PD-së i jepet një shans tjetër, Shqipëria do të hiqet zvarrë nga këta tre persona
“Si mundet t’u jepet atyre një shans tjetër. Mandati i tretë i PS është heqja e çdo mundësie që Ilir Meta, Sali Berisha, Kryemadhi të kenë një shans tjetër për të marrë përsëri Shqipërinë për hesap të llogarive të tyre të pushtetit të tyre, të pasurive të tyre, dhe të gjithë privilegjeve të t yre. Dhe natyrisht kur vjen puna, Luli s’ka si e merr një shans, sepse Luli nuk është Luli. Luli është Saliu, Luli është Iliri, Monika. Është kukull. Si ato kukullat, po nuk i tunde, flen, kur tunden hapin sytë, dhe nxjerrin këngën në formë ninulle për të vënë bebet në gjumë. Është kukull e tundur, kur zhduket nga ekrani është kukull që fle. Në prehërin e tre xhagajdurëve të cilët janë arsye shumë e fortë të mandatit të tretë të PS”, ka thënë Rama.
Rama tha se mandate i PS është për të mos lënë në mes punët e nisura. Me tej ai tha se PS ka qeverisur mes një lufte që do rrëzonte përtokë çdo elefantë, por nuk i rrëzoi dot socialistët.
“Mandati i tretë i PS është në thelb mandat për të mos lënë në mes një punë të nisur në çdo drejtim, një punë që duhet të vazhdojë me patjetër. Një punë që ka filluar të japë rezultate, por ende nuk ka sjellë të gjitha rezultatet që duhet. Ne po mbyllim një mandat të dytë, kush mund ta mohojë që është i thyer në mes. Kush na thotë se ne kemi qeverisur 8 vjet dhe harron se në fakt mandati ynë i dytë është i thyer në mes. Duhet ta dëgjojë mirë që ne kemi qeverisur pjesërisht dhe kemi luftuar totalisht një luftë që do kishte rrëzuar përtokë një elefant. Po nuk ka rrëzuar dot përtokë PS”, tha Rama.
