Ditën e sotme, kryeministri Edi Rama bëri me dije se shqiptarët që kanë mbetur jashtë vendit pas mbylljes së kufijve do rikthehen në atdhe të hënën.
Mbrëmjen e sotme në komunikimin e tij me qytetarët në kuadër të asaj që Rama e quan ‘platforma e emergjencës’ tha se personat që ndodhen në vendet e tjera të botës dhe do të sillen në Shqipëri janë një listë e mbyllur prej 1379 persona.
Po ashtu, Rama tha se në Shqipëri do kthehen vetëm ata persona që kanë ngecur në shtetet e tjera për shkak të mbylljes së kufijve dhe jo shqiptarët që jetojnë jashtë shtetit dhe në kohën e koronavirusit kujtohen ta kalojnë atë në Shqipëri, me shpresën se vendi ynë nuk është shumë i goditur nga pandemia.
“Kjo nuk ka për të ndodhur. Sot kam lajmëruar se do të riatdhesojmë një listë e mbyllur prej 1379 persona. Nuk kamë thënë që do nisim avionin dhe do sjelli mbi 300 mijë njerëz në Shqipëri. Kjo nuk është e arsyeshme dhe as e mundur. Nuk jemi në gjendje t’i marrim të gjithë të rikthen këtu, por ata persona që kanë vërtet hall dhe ngecën në vende të ndryshme të botës për shkak të mbylljes së kufijve. Kush jeton jashtë vendit dhe kujtohet sot se dua të kthehem në Shqipëri nuk është e mundur. Kush thotë se dua të vijë në Shqipëri tani se atje koronavirusi nuk po bën hatanë si në vendin ku jemi, nuk ka për të ndodhur. Ne do sjellim vetëm raste emergjence dhe është një listë e mbyllur. ‘Lasgushi’ do të mbledhë ata njerëz që janë në listat e ambasadave dhe asnjë më shumë. Nga ana tjetër ata që alarmohen se ato mund të sjellin virusin , është të flasësh në hava” tha Rama.
Më tej, kryeministri u ka kërkuar qytetarëve që të rezistojnë përballë luftës me koronavirusin.
“Po cfarë ka ndodhur këtu, ka ardhur Viti i Ri dhe do të shpërndajmë çokollata. Ata që nuk kanë nevojë për ndihmat vetëm bëjnë të kundërtën e atyre që i marrin dhe na falenderojnë. Luftën nuk e kam sjellë unë, aq qeveria, por na ka gjetur, bëhuni trima dhe rezistoni se edhe lufta për njeriun është. Njerëzimi ka bërë lufta gjakatare dhe ka qëndruar në llogore edhe nuk ka qëndruar duke u ankuar në telefon” tha Rama.
