Ka nisur zbatimi i disa marrëveshjeve mes dy qeverive, asaj të Shqipërisë dhe të Kosovës, që u nënshkruan vitin e kaluar në Pejë.
Kryeministri Edi Rama, gjatë fjalës së tij në përurimin e doganës së Kosovës në portin e Durrësit tha se në pranverë do të kemi një kufi fluid mes Kosovës dhe Shqipërisë, njësoj si kufijtë e vendeve të BE.
Rama tha se Shqipëria e Madhe nuk ekziston dhe kjo është një sajesë e armiqve, pasi ka komb shqiptar.
“Jo më larg se dje, Ministria e jonë e Brendshme ka përfunduar draftin teknik dhe në pranverë të kemi në kufirin e sotëm një sistem të ri, sistemin Shengen. Tani kemi kaluar në një kontroll të unifikuar dhe zyra e policisë në kufi është zyrë e përbashkët dhe punonjësit do të qëndrojnë në një zyrë.
Në pranverë do kemi një kufi fluid, njësoj si kufiri mes Francës dhe Gjermanisë. Ne duam që këtë sistem ta vendosim edhe me Maqedonisë dhe Malin e Zi. Kush na thotë se kjo është një Shqipëri e Madhe, ju them se Shqipëria e Madhe është një sajesë e armiqve. S’ka Shqipëri të Madhe, por bashkim të shqiptarëve.”- tha Rama.
Në fjalën e tij, ministri në detyrë i Ekonomisë dhe Financave , Arben Ahmetaj tha se volumi i mallrave të shkëmbyera mes Kosovës dhe Shqipërisë në vitin që sapo mbyllën është rritur me 6 për qind.
“Volumi i mallrave nga Kosova ka qenë 6 për qind më shumë se viti i kaluar. Jam i bindur se me funksionimi e pikës doganore të Kosovës në Durrës, do të kemi një reflektim edhe në shifra të mëtejshme të shkëmbimeve tregtare.”-tha Ahmetaj.
