Kanina, dikur një nga zonat më të gjalla blegtorale në jug të vendit, po fshihet nga harta me firmën e Edi Ramës. Në një projekt që nuk ka asnjë lidhje me zhvillimin lokal dhe as me interesin publik, por vetëm me interesin e një oligarku mediatik nga Tirana, qeveria ka vendosur t’i japë me qira për 10 vjet (me të drejtë rinovimi) 834 hektarë tokë publike në faqet e malit Shashicë-Gumenicë, për ndërtimin e një parku fotovoltaik.
Toka që historikisht është përdorur nga banorët e Kaninës për bagëti dhe jetesën e përditshme, do të zhduket si ekonomi, si burim jetese dhe si identitet. Në emër të energjisë së rinovueshme, Shqipëria po sakrifikon fshatin dhe bujqësinë, jo për të përmirësuar jetesën e qytetarëve, por për t’ua dhuruar pasuritë publike klientëve të Ramës. Dhe Kanina është vetëm shembulli i radhës në këtë strategji të sistemuar grabitjeje të tokës.
Që në nëntor të vitit të kaluar, në tavolinën e kryebashkiakut të Vlorës, Ermal Dredha, mbërriti një “shprehje interesi” për ndërtimin e këtij parku, që do të përpinte të gjithë faqen e malit të Kaninës. Zona nuk është e pabanueshme, përkundrazi. Atje gjenden qindra stane, mbi 7 mijë krerë bagëti, dhe familje që jetojnë prej brezash me të ardhurat që sigurojnë nga blegtoria. Por kjo nuk ka asnjë rëndësi për qeverinë.
Në vend të mbrojtjes së jetesës së banorëve, u ushtrua presion politik. Rama kërkoi që procedurat të nisin, ndërsa Dredha, përballë rezistencës së komunitetit lokal, u përpoq t’ia zvarriste miratimin projektit. Por kjo nuk i pëlqeu Kryeministrit. Pamjet filmike nga festa e 34-vjetorit të Partisë Socialiste tregojnë një Rama të tërbuar që i bërtet kryebashkiakut të tij. Fillimisht për zjarret në Vlorë, por realisht për “dredhitë” me tokën e Kaninës.
Përgjigjja e Ramës ishte brutale: zbarkim personal në Vlorë dhe një shkarkim masiv i të gjithë drejtorëve të bashkisë. Për herë të parë në historinë e shtetit shqiptar, një kryeministër ndërhyn në këtë mënyrë në një pushtet tjetër. Një shtetrrethim politik që e ktheu Bashkinë e Vlorës në një repart ushtarak nën komandë të drejtpërdrejtë.
Dhe ja ku jemi: menjëherë pas këtij operacioni politik, Ermal Dredha firmos projektvendimin për dhënien me qira të tokës. Fati i Kaninës tashmë do të vuloset më 21 korrik në Këshillin Bashkiak të Vlorës. Ironia është se nuk dimë as emrin e kompanisë që përfiton këtë pasuri publike. Vetëm nën zë përmendet një emër i njohur oligark, që ka marrë prona dhe projekte gjithandej në Jug. Sot, po bëhet pronar edhe i Kaninës.
Banorët e Kaninës kanë ikur. Shpopullimi është pasojë e drejtpërdrejtë e politikave të qeverisë. Kush do të protestojë për këtë tokë? Kush do të kundërshtojë, kur votuesit kanë emigruar ose janë varfëruar në kufijtë e mbijetesës? Kanina votoi 88% për Partinë Socialiste. Tani, ky është shpërblimi.
Në këtë skemë, nuk ka më rëndësi qytetari, komuniteti, historia apo trashëgimia. Ka rëndësi vetëm që projekti i radhës të kalojë. Që klienti i radhës të marrë pjesën e vet. Që toka të mos jetë më për bagëtinë, por për profitin. Shqipëria po zbrazet, toka po grabitet, dhe në fund, kur të kenë ikur të gjithë, “pronari i Shqipërisë” do mbetet vetëm, bashkë me oligarkët e tij. Dhe ky është fundi i çdo ideje për zhvillim të qëndrueshëm apo drejtësi sociale në këtë vend.
