Kryeministri Edi Rama ka reaguar për situatën e zjarreve që kanë përfshirë vendin tonë. Në një status në Facebook, Rama shkruan se angazhimi disaditor i ushtrisë për shuarjen e zjarreve në Karaburun e jo vetëm, meriton respekt e inkurajim në një kohë kur shumë vende po përballen me kërcënimin e zjarreve.
“Angazhimi disaditor për shuarjen e zjarreve në Karaburun e jo vetëm, nga Forcat e Ushtrisë dhe trupat Rangers në terren meriton respekt e inkurajim, në një kohë kur shumë vende po përballen me kërcënimin e zjarreve #SkaKohëPërPushim”, shkruan Rama.
Vendi ynë është përfshirë prej disa ditësh tashmë nga zjarret që kanë fituar terren edhe si pasojë e temperaturavë të larta. Ditën e sotme ministri i Mbrojtjes, Niko Peleshi tha se e vetmja vatër serioze aktive është Karaburuni, madje flakët kanë kërcënuar edhe bazën e Pashalimanit. Po ashtu zjarret kanë prekur edhe Mamurrasin dhe ditën e djeshme shkuan në ndihmë edhe zjarrfikëset e Krujës dhe Laçit. Po ashtu disa ditë më parë ka qenë situata kritike në qytetin e Fierit, ku fusha e mbetjes në Sheq u përfshi nga flakët, që nuk u ndalën për disa ditë. Era përhapi në qytet dhe në rrethina një re tymi dhe aromën e rëndë të mbetjeve që e bënë të vështirë aktivitetin e përditshëm.
