Numri i rasteve me koronavirus prej ditësh vijon të jetë në rënie. Gjithashtu, Komiteti Teknik i Ekspertëve vendosi lehtësim të masave kufizuese kundër Covid-19, pas një përmirësimi të situatës epidemiologjike.
Ndërkohë mëngjesin e kësaj të hënë kryeministri i Shqipërisë, Edi Rama, ka publikuar një video në rrjetin social “Facebook”, nëpërmjet të cilës tregon se situata e Covid, është drejt përmirësimit. “Tirana u hap”, thuhet nëpërmjet kësaj video.
https://fb.watch/5P16BbeDJe/
Deri më tani, plot 770 mijë persona kanë marrë doza kundër Covid-19 nëpërmjet fushatës së vaksinimit, ndërsa objektivi mbetet vaksinimi i 1 milion qytetarëve brenda muajit qershor.
Ministrja e Shëndetësisë, Ogerta Manastirliu bën me dije se ditën e nesërme, pritet të mbërrijnë 11.700 doza të vaksinës Pfizer.
Gjithashtu thekson se me vaksinimin e transportit publik do të realizohen më shumë se 770 mijë vaksinime për qytetarët mbi 60-vjeç dhe punonjësit e shërbimeve kritike.
Ndërkohë punonjësit e transportit publik vijojnë të marrin dozën e vaksinës kundër koronavirusit.
Situata në Shqipëri, por dhe në vendet e tjera të botës, sidomos në BE, po vjen gjithmonë e më shumë drejt përmirësimit. Prodhimi në masë i vaksinave dhe vaksinimi masiv i qytetarëve, ka ulur ndjeshëm numrin e infektimeve të reja dhe pandemia shumë shpejt, pritet të jetë vetëm një kujtim i hidhur…
