Kryeministri Rama ka publikuar një grafik për sa i përket vaksinimit të qytetarëve në vendet e rajonit të Ballkanit. Në grafik shihet se Shqipëria renditet në vendin e parë, ndërsa nga pas e ndjekin Kroacia dhe Serbia dhe Mali i Zi. Në grafik përfshihet edhe Turqia. Kosova renditet e parafundit, pas Maqedonisë së Veriut, ndërsa Bosnje-Hercegovina është vendi që ka kryer më pak vaksinime.
Rama shkruan se për të është nder udhëheqja e kësaj lufte dhe nxjerrja e Shqipërisë nga tuneli i pandemisë.
“#KrenarpërShqipërinë🇦🇱
Nuk ka nder më të madh për mua se udhëheqja e kësaj lufte për ju e me ju❤️dhe nxjerrja së afërmi e Shqipërisë përtej tunelit të pandemisë, më shpejt se shumë të tjerë në Europën ku jetojmë🙏”.
Në vendin tonë kanë ardhur deri tani më shumë se 700 mijë doza vaksinash, ndërsa ditën e djeshme erdhën 208 mijë doza të vaksinës kineze Sinovac. Po ashtu erdhën edhe 8190 doza nga vaksina Pfizer. Ndërkohë, sot është lajmëruar se vendi ynë do të marrë 145 mijë doza të vaksinës Pfizer. Kjo sasi dozash është siguruar nga kontrata e Bashkimit Europian, që do të shpërndajë doza në 6 vendet e Ballkanit Perëndimor. Nga këto, Shqipëria ka siguruar sasinë e dytë më të madhe ne rajon.
