Kryeministri nuk ka një mik që ta besoj në Facebook (veç militantëve të PS), megjithëse rreshton 1,3 milionë ndjekës. Sot në mëngjes u premtonte shqiptarëve ujë të pijshëm për 24 orë deri në vitin 2023! Menjëherë vërshuan komentet e qytetarëve. Rrena”, shkruan një komentues në postimin e kryeministrit. “Mos gënje o njeri”.
Pasi ka përshëndetur, kryeministri ka lëshuar një grafik dhe postoi premtimin.
“…dhe me këtë fakt të punës sonë të pandërprerë në këto vite për mbylljen e plagës shumë e shumëvjeçare të mungesës së ujit, falë së cilës në dhjetor arrijmë dhjetëfishimin e numrit të banorëve që kanë 24 orë ujë krahasuar me 7 vjet më parë, ju uroj një ditë të mbarë!”
Sinqerisht është turp, shkruan një komentues,- që në vitin 2020 ju vazhdoni me premtimin e ujit 24 orë. A thua se jemi ndonjë vend pa burime ujore.
“Nuk e di dhe nuk flas dot për të tjerët mbase dhe mbase e kanë 24 orë, por di që zona ku unë jetoj në Vlorë, që në vijë ajrore është 500 metra larg nga sheshi i kombit (Sheshi Flamurit) nuk kemi pasur dhe nuk kemi me shumë se dy orë ujë në ditë ujë…” shkruan një qytetar.
“Dhe një investim që u nis nga një fond holandez me 25 milion euro dhe ku u shqyen gjithë rrugët e Vlorës, u tret rrugëve nga babëzia e atyre që e patën në dorë, nuk ndryshoi asgjë, për mos të thënë që u bë më keq.
Dhe këtu po flasim për Vlorën ku uji derdhet në det ditë e natë”, vazhdon komentuesi.
Ndërsa një tjetër qytetar i irrituar shkruan: “Gjëja më e turpshme që bëni si politikanë është që akoma sot, në 2020 në një kohë moderne premtoni ujë 24 orë në ditë si arritje ndërkohë që duhet të jetë diçka normale… premtoni diçka tjetër reale jo ujë e drita e rrugë, sepse jeni të detyruar t’i bëni këto gjëra pa i premtuar në fushata”.
Ndërsa një komentues nga Saranda shkruan: “Kështu u propagandua dhe për Sarandën, 2 vjet rresht u shqep çdo rrugë e qytetit për ujësjellësin dhe ne përsëri nuk kemi 24 orë ujë. Kur do t’i heqim depozitat nga tarracat tona?”
“Tallu, edi tallu, se ky popull kështu e do. Kur është për të protestuar për gjërat më elementare këtu nuk ngrihet njeri”, shkruan një nga komentuesit në mëngjes.
/Gazeta Reforma/
