Kryeministri Edi Rama ka vijuar sërish me propagandën boshe. Me anë të një mesazhi të gjatë, ka hedhur dyshime e supozime se çfarë do të ndodhte në vend nëse pandemia do të binte shtatë vite më parë.
Ai ka publikuar pamje nga rikontruksioni i spitalit të Urgjencës dhe Patologjisë në Elbasan, duke përsëritur edhe njëherë arsyet se përse meriton mandatin e tretë.
I fokusuar tek gjendja e spitaleve, Rama u zotua se në mandatin e tretë do të vijojë puna për reformimin e sistemit, premtime këto të vjetra që ende nuk janë plotësuar.
Ai thekson se “nëse virusi do kishte sulmuar 7 vite më parë, ku spitalet ishin në këtë derexhe, a e imagjinoni dot se çfarë qameti do ishte bërë apo jo”?
Veç reformimit, “zvarritja” e rindërtimit nga tërmeti dhe ‘ngritja në qiell’ e sigurimit të dozave të vaksinave, janë arsye të mjaftueshme për kryeministrin për të kërkuar votat.
Mesazhi i Ramës:
Po sikur të kishte sulmuar virusi para 7 vjetësh kur spitalet ishin deri edhe në këtë derexhe apo sikur largoqoftë edhe ne të kishim qenë si ata të para 7 vjetëve dhe të na kishte gjetur me ato farë spitalesh, a e imagjinoni dot se çfarë qameti do ishte bërë apo jo?
Ky është Spitali i Urgjencës dhe Patologjisë në Elbasan dhe besoj s’ka nevojë për koment, pavarësisht se kush nuk do të shikojë s’ka shans ta shohë ndryshimin, por vazhdon avazin se sot është më keq se dje!
Jo, sot spitalet nuk kanë asnjë krahasim me dje, por unë jam i pari që e di se ky ndryshim fantastik i infrastrukturës nuk mjafton, sepse duhet ta kryejmë deri në fund edhe ndryshimin që kemi nisur këto vite në organizimin e bluzave të bardha, menaxhimin e tyre, cilësinë morale e jo vetëm profesionale të shërbimit, duke pastruar deri në fund abuzuesit e batakçinjtë nga radhët e atyre bluzave!
Prandaj na duhet Mandati i Tretë🤝
