Pasditen e sotme mbështetës të Partisë Demoktratike në Rrogozhinë janë bërë bashkë dhe kanë bllokuar autostradën Kavajë-Lushnje në shenjë proteste.
Sipas degës së PD-së në këtë qytet, protesta është realizuar në formë tubimi kundër qeverisë për çmimet e larta, mungesën e theksuar të vendeve të punës si dhe largimin e të rinjve nga vendi.
Ata kanë arritur që të bllokojnë autostradën në të dy kahet, duke ndaluar kështu edhe qarkullimin e automjeteve.
Protesta nuk ishte fare pa qëllim, pasi ishte lajmëruar se këtë pasdite në atë rrugë do të kalonte kryeministri Rama dhe kjo i ka shtyrë më shumë qytetarët të ndërmarrin këtë hap.
Sipas zyrës së shtypit të Partisë Demokratike, protesta detyroi Ramën të devijojë rrugë.
Eskorta e kryeministrit është bllokuar nga qytetarët në rrethrrotullimin e Rrogozhinës, ndërsa ishte nisur për në Lushnje. Po sipas PD, eskorta e kreut të qeverisë është detyruar të ndjekë rrugën dytësore për të vijuar udhëtimin.
