Kryeministri Edi Rama doli sot në një konferencë për shtyp, për të folur mbi pandeminë, që po qarkullon në vend prej 1. Përveçse sinjalizoi mbërritjen e mundshme të varianteve të reja COVID në Shqipëri, Rama nuk humbi rastin edhe të hiqte disa përgjegjësi nga vetja për menaxhimin e situatës. Kryeministri u shpreh se fajin për rritjen e rasteve e kanë bizneset dhe klientët që nuk kanë respektuar masat e vendosura.
“Me vjen keq që shoh inspektorë, gjëja e fundit që dua të shoh unë që inspektorët hyjnë e dalin në biznese. E kam shumë të qartë që kur nëpër lokale, jo dy metra, por rrinë ngjitur aty dhe bëjnë party. Ja marrin njëri-tjetrit Covid-in vesh më vesh….do përgatitemi për zbatimin rigoroz të masave pa dashur të kthehemi tek kufizimet e vitit të shkuar”, tha Rama, duke theksuar se mund të ketë një kufizim në orarin e daljes.
Mirëpo çfarë ndodh në këtë rast me bizneset që përmend kryeministri?
“Iconstyle.al” ka ndjekur gjithmonë me shqetësim krizën që kanë kaluar baret dhe restorantet përgjatë pandemisë. Këto ishin bizneset që u prekën më shumë nga karantina e parë, që zgjati 3 muaj, e si pasojë pati një reduktim në masë në stafin e punonjësve. Kreu i shoqatës së bareve dhe restoranteve, Enri Jahaj, ka pohuar më herët për iconstyle.al se xhiroja e këtyre bizneseve është reduktuar me 50% dhe se është ulur akoma më shumë pas ndryshimeve të herë pas hershme në orën policore.
Ndërkohë sipas Jahaj nëse do të ketë sërish një tjetër kufizim në orar do të preken shumë turnet e dyta dhe në këtë industri nuk do të ekzistojë më koncepti i biznesit.
“Kjo do preki turnet e dyta të cilat baret dhe restorantet i kanë mbajtur me shumë forcë. Këta njerëz do dalin të papunë dhe do shkojnë të kërkojnë ndihmë sociale dhe ekonomike, kjo do jetë në dëm të shtetit dhe ekonomisë. Jemi të lodhur në nivel biznesi duke mbajtur me forcë me mish e me shpirt stafet ka ardhur momenti që nuk i përballojmë shpenzimet. S’ka më biznes në këtë lloj industrie, ka vetëm një punë për të mbajtur veten me bukë për të mos ndenjur në shtëpi”, ka thënë Jahaj ditën e sotme.
Baret dhe restorantet nuk janë problemi i vetëm!
Baret dhe restorantet nuk janë elementi i vetëm që përbëjnë problem për shtimin e rasteve të reja. As në shkolla dhe transport publik nuk ka respektim të masave, që vjen sa nga mosndërgjegjësimi i popullit, por edhe nga papërgjegjshmëria institucionale. Për këtë arsye Jahaj ka bërë thirrje që ndërgjegjësimi të fillojë në nivel individi e më tej tek bizneset.
“Le të penalizohen sa të duan bizneset, sot po flasim për një mbajtje aktiviteti për të qenë në punë dhe rritja e penalizimit nuk do të ndihmojë. Çdo gjë fillon nga individi është si puna e asaj që ne kërkojmë një ambient më të pastër, do ta shohim në derën e shtëpisë tonë dhe pastaj të merremi me komunitetin”, ka thënë kreu i shoqatës së bareve dhe restoranteve për “Report Tv”.
Shumica e bizneseve penalizohen nga konkurrenca e pandershme
Një pjesë e madhe e restoranteve dhe bareve janë penalizuar edhe nga konkurrenca e pandershme këto kohë. Për disa prej tyre rregullat e vendosura nga qeveria nuk kanë funksionuar, duke përdorur mënyra nga më të ndryshmet për të mbajtur hapur objektet e tyre edhe jashtë orarit të lejuar.
Ne kemi parë shpesh se si policia ka bërë një sy qorr e një vesh shurdh, pa marrë asnjë lloj mase ndaj disa bizneseve që kanë shkelur të gjithë rregullat e pandemisë, duke nisur nga shkelja e orarit e deri tek mosrespektimi i distancës. Lidhja e drejtpërdrejtë e disa biznesmenëve me qeverinë apo edhe dhënia e parave nën dorë, i ka lejuar shumë prej tyre të vazhdojnë të lirë aktivitetin. Nga ana tjetër ata më “të dobëtit” nuk kanë mundur të bëjnë asnjë lloj manovre, duke rrezikuar kështu falimentimin.
