Që prej mëngjesit të sotëm e deri të dielën janë ndaluar të gjitha lëvizjet me automjete private, teksa Policia Ushtarake dhe ajo e Shtetit janë në terren në kërkim të personave të ardhur nga Italia që nuk vetëizolohen.
Kjo pasi duke qarkulluar të lirë ata rrezikojnë edhe personat e tjerë, siç ka bërë një 50-vjeçare nga Berati.
Pacientja i gënjeu, stafi mjekësor i Spitalit Rajonal Berat përfundon në karantinë
Mirëpo, së fundmi, kryeministri Edi Rama lajmëron se Policia e Shtetit ka identifikuar të gjithë qytetarët që kanë hyrë nga Italia në Shqipëri 14 ditët e fundit.
Nëpërmjet numrave të telefonit dhe adresave të tyre, po vazhdon operacioni i posaçëm i sensibilizimit dhe monitorimit, teksa shefi i qeverisë thekson faktin se kush nuk zbaton rregullin e vetëkarantinimit do gjobitet me 5 mijë euro.
Po ashtu, Rama ka publikuar edhe mesazhin që u është dërguar këtyre qytetarëve.
Postimi i plotë
POLICIA E SHTETIT KA IDENTIFIKUAR TË GJITHË QYTETARËT SHQIPTARË QË KANË HYRË NGA ITALIA NË 14 DITËT E FUNDIT. PASI KA DISPONUAR NUMRAT E TELEFONIT DHE ADRESAT E TYRE PO VAZHDON OPERACIONIN E POSAÇËM TË SENSIBILIZIMIT DHE MONITORIMIT TË TYRE. BASHKËNGJITUR ËSHTË MESAZHI QË U ËSHTË DËRGUAR KËTYRE QYTETARËVE DHE DO TË VIJOJNË TROKITJET NË DYERT E TYRE PËR T’U SIGURUAR SE PO ZBATOJNË DETYRIMIN E VETËKARANTINIMIT 14 DITOR. SHKELJA E KËTIJ DETYRIMI NDËSHKOHET ME 5 MIJË EURO DHE SHKELËSI DO TË NDALOHET TË DALË NGA SHQIPËRIA PA PAGUAR GJOBËN!
NDJESË 1000 HERË? PO KJO ËSHTË LUFTË DHE NDRYSHE NUK FITOHET!
FRIKË ASPAK, KUJDES PO!
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
