Kryeministri i vendit, Edi Rama, ka publikuar pamje nga Vlora. Kreu i qeverisë me anë të një postimi në rrjetet sociale ka treguar se ka përfunduar restaurimi në zonën e Lungomares. Krahas postimit Rama shkruan se ka përfunduar ngritja e plazhit publik me 5 yje, duke shtuar se deri dje kjo zonë publike ishte e mbytur nga kioskat dhe ferrat. Në fund Rama shkruan se duket se vendi po del nga tuneli i errët i pandemisë dhe se Vlora dhe e gjithë Shqipëria kanë filluar të marrin frymë. Ai premton se do të bëjnë shumë më shumë se kaq. Rama e ka quajtur kartolinë pamjen që sjell nga Lungomarja.
“MIRËMËNGJES dhe me këtë kartolinë nga Lungomare 2 në Vlorë, ku po përfundon plazhi publik me 5 yje, aty ku deri dje ishte një turp publik me kioska e me ferra, duke ju thënë të gjithëve se tani që po dalim nga tuneli i pandemisë, shumë më shumë akoma do bëjmë për Vlorën e krejt Shqipërinë, ju uroj një ditë të mbarë”, shkruan Rama.
Kujtojmë se përpara disa muajsh në këtë zonë rinisën punimet për restaurimin dhe rregullimin e pjesës së mbetur, nga plazhi publik. Afati i mbarimit të punimeve ka mbaruar kohë më parë.
