Prokuroria e Posaçme i është drejtuar Kuvendit të Shqipërisë me kërkesë për heqjen e imunitetit të deputetes Belinda Balluku dhe dhënien e autorizimit për arrestimin e saj. Pas këtij zhvillimi, ka reaguar kryeministri Edi Rama përmes rrjeteve sociale, duke komentuar hapur veprimin e SPAK dhe rolin e Kuvendit në këtë proces.
Në reagimin e tij, Rama e lidh kërkesën e SPAK me vendimin e fundit të Gjykatës Kushtetuese, e cila rrëzoi pezullimin nga detyra të zv.kryeministres, dhe thekson se mazhoranca do të mbajë një qëndrim politik përpara vendimit që kërkohet nga Kuvendi.
Reagimi i plotë i kryeministrit Edi Rama:
“Pasi u rrëzua nga Gjykata Kushtetuese për pezullimin antikushtetues dhe antidemokratik të një anëtari të qeverisë, pa u tharë ende boja e vendimit të Kushtetueses, prokurori në fjalë i kërkon Kuvendit, autorizimin për të arrestuar zv.kryeministren, me burg ose në shtëpi. Që arrestet pa gjyq, në daç në shtëpi e në daç me burg, janë bërë një modë e vrazhdë në Shqipëri, e që Shqipëria është bërë një vend me më shumë të paraburgosur se sa të burgosur, një fakt i turpshëm pa asnjë lidhje me standartet demokratike europiane, gjë që ka shqetësuar seriozisht edhe Këshillin e Europës, kjo dihet botërisht.
Por sigurisht që në rastin në fjalë, ne s’mund dhe s’do ta paragjykojmë kërkesën e prokurorit special, por duke qenë se ndryshe nga proceset e tjera, ku ne si rregull s’flasim për përmbajtjen e çështjeve, këtë herë na kërkohet të japim opinionin tonë, ne do të angazhohemi me të gjithë përgjegjësinë tonë përpara shqiptarëve që na dhanë 83 mandate, e do të përgatitemi për të mbajtur një qëndrim të drejtë, të qartë e të denjë, si forca udhëheqëse e vendit dhe e Reformës në Drejtësi.”
Kërkesa e SPAK për autorizimin e arrestimit të Belinda Ballukut pritet të shqyrtohet nga Kuvendi, ndërsa reagimi i kryeministrit sinjalizon se mazhoranca nuk ka ndërmend të qëndrojë neutrale politikisht në këtë proces dhe paralajmëron një qëndrim aktiv në debatin parlamentar që do të pasojë.
