Kryeministri Rama mungoi në seancën e kaluar plenare, gjë që ka shkaktuar reagime të shumta, madje edhe tension në Kuvend.
Ndërkohë që lidhur me këtë çështje dhe mënyrën se si po “fshihet” kryeministri Rama, ka reaguar edhe ish-presidenti Bamir Topi.
Bamir Topi tha “News 24” se mungesa e transparencën lidhur me çështjen McGonigal, nuk bën gjë tjetër veçse shton dyshimet. Gjithashtu u shpreh se mungesa e kryeministrit Edi Rama në seancën plenare në Kuvend, e cilësoi si një hap të gabuar. Ish-presidenti Bamir Topi është shprehur se nuk ka asnjë ndryshim në fizionominë e kryeministrit Edi Rama, ndonëse emri i tij është lakuar në skandalin McGonigal.
“E kam parë në dy planë, një ku ai ka detyrimin për të dhënë të gjithë shpjegimet në vendin e tij në SHBA. Refleksionet i ka edhe në Shqipëri, por mbetet politik dhe këtu gjërat janë komplikuar sepse sikurse ndodh në politikën shqiptare, këtu nuk ka transparencë dhe kjo shton dyshimet. Aty ku shtohen dyshimet, shtohet kakofonia dhe vjen një situatë kaotike dhe gjërat kalojnë në ekstrem. Kryeministri i përfshirë apo jo situata këtu mbetet problem politik. Është detyrim i kryeministrit të bëjë transparencë sa i takon. Këtë javë ai shmangu parlamentin. Do të thoja që kjo është një sëmundje e vjetër që e karakterizon Ramën”, deklaroi ish-presidenti Bamir Topi.
